பிடித்தப் பாடலைக் கேட்பேன்
விரும்பிய உணவை உண்பேன்
நினைத்த நொடியில் புறப்பட்டு வெளிச்செல்வேன்
விருப்பம்போல் ஆடை அணிவேன்
கடற்கரையில் காலாற நடப்பேன்
உறக்கம் தொலைத்த இரவொன்றில் வானம் பார்த்து அமர்ந்திருப்பேன்
புத்தகங்கள் படிப்பேன்
படிக்காமலும் இருப்பேன்
அறையை என் விருப்பம் போல மாற்றியமைப்பேன்
மொட்டை மாடியில் பூச்செடிகள் வளர்ப்பேன்
மணிக்கணக்காய் ஆன்லைனில் இருப்பேன்
ஜன்னல் வழியே தூரத்துப்பறவைகளை வேடிக்கைப் பார்ப்பேன்
மழை நனைக்க சாலை நடுவே நடந்து வருவேன்
காய்ச்சல் கண்டு போர்வைக்குள் சுருண்டுக் கிடப்பேன்
அடிக்கடிக் கொள்கைகளை மாற்றிக்கொள்வேன்
திரையரங்கில் கூட்டத்தோடுக் கூட்டமாய் விசிலடிப்பேன்
கதவடைத்து ஆதங்கத்தை அழுதுத்தீர்ப்பேன்
இதுதான்
சுதந்திரம் என்கிறேன்
இல்லை
நீ தனிமையிலிருக்கிறாய்
என்கிறீர்கள்
தனிமையோ
விடுதலையோ
பெயர்களா அவசியம்
இருக்கும் வரை
வாழ்வை
வாழ்ந்து தீர்த்துக்கொள்கிறேன்
சற்றே
விலகி இருங்களேன்
-ரிஸ்கா முக்தார்-
No comments:
Post a Comment